Donostiako alde zaharreko Konstituzio plazan (43º19'24.75" I 1º59'06.96" M) aurkitzen den XIX. mendeko estilo neoklasikoko eraikina da. Silvestre Pérez-ek diseinatu zuen 1819. urtean orduan plaza Berria deitzen zen estilo bereko enparantzako mendebaldeko albo txikia ixteko. Eraikina egiteko beharra Donostiako sute ospetsuren ondoren iritsi zen, bertan kokatzen zen eraikina suntsitu egin baitzen. Hainbat urte itxoin behar izan zen eraikitzen hasteko. 1825. urtean, Silvestre Pérez, eraikinaren diseinuaren egilea zena, hil egin zen eraikina hasi baino lehen. Donostiako udalak zituen arazo ekonomikoengatik, eraikitze lanak 1829 urtera arte ez ziren hasi, obra zuzenketa P. Manuel de Ugartemendia-k eraman zuelarik. Diseinu eta gauzatze prozesuetan bi arkitekto ezberdin arduratu ziren beraz. 1832. urtean eraikitzeaz bukatu zutenetik 1947 urtera arte Donostiako hiriaren udaletxearen eraikina izan zen.