Donostiako udal-arkitektoa. Briviescan (Burgos) jaio zen 1824ko abenduaren 19an. 1897ko urriaren 1ean zendu zen.
Madrileko San Fernando Akademian karrera egin ostean eta artean arkitekto-titulua jaso gabe zuela, burdinbidearen hainbat tramuren instalazioan parte hartu zuen, horietako zenbait Nafarroan zehar, esate baterako, Iruñea Tafallarekin, Alesbesekin eta Altsasurekin lotzekoak. Biriketako gaixotasun batek jo eta Madrilera joan behar izan zen. Han, azkenik, ikasketa amaierako azterketa egin ahal izan zuen eta, modu horretan, 1860ko uztailaren 24an arkitekto-titulua eskuratu zuen.
1866an Segoviako udal-arkitekto izendatu zuten. Denbora laburrez izan zen kargu horretan, izan ere, hurrengo urtean Donostiako udal-arkitektorako plaza eskuratzeko lehiaketara aurkeztu zen, Eskoriatzako arkitektoak utzitakoa. Hiru hautagai aurkeztu ziren. Bakarra ere ez zen donostiarra eta, azkenik, 1867ko abuztuaren 1ean Barriocanal hautatu zuten aho batez Donostiako udal-arkitekto izateko, izan ere, hari buruzko txostenak ezin hobeak ziren. Hogeita hamar urtez izan zen Donostiako udaletxeko obretako buruzagi, 72 urterekin zendu zen arte.
Bere ibilbide luzean zehar Nemesio Berriocanalek udaletxeak agindutako obra ugari proiektatu eta zuzendu zituen. Jarraian garrantzitsuenak zerrendatuko ditugu. Zerrenda Serapio Mugicak egindako Arquitectos municipales de San Sebastián ikerketatik hartu dugu:
- Atotxako pilotalekuaren horma eta zola
- Morlanseko ur-eroatea gauzatzeko hodi berria
- San Vicente Parrokiako Koroaren oholtza, basamentua eta organo-kaxa barnea
- Pozo kaletik arrain-garbitegira urak eramateko aurrekontu eta baldintzak, eta bonba gordetzeko etxolaren proiektua
- Zurriolako musika-kioskoa
- San Martin auzoko lurren aitorpena, zabalguneko lurretan egindako konpentsazioekin
- Askatasunaren Hiribideko zoladura
- Udaletxeko teilaturako armadura
- Gipuzkoako plazako arkupeen lauzadura
- Antigua auzora ur-eroatea
- Errotazarreko ur-eroatea eta depositu handi baten eraikuntza
- Atotxako pasealekua luzatzeko Norteko Trenbide Konpainiarekin lurrak konpentsatzeko proiektua
- Peñaflorida kaleko ikastetxeak
- Arrandegiko planoak eta hiltegia handitzeko proiektua
- Barrutiko kartzelaren proiektua
- Zabalguneko proiektua aldatzeko memoria, planoak eta aurrekontua
- Urumea birbideratzeko proiektua (lagunduta)
- Bretxako merkatu berriaren proiektua
- Errepidea Santa Katalinako zubitik Kristina-eneara desbideratzeko proiektua
- Institutua eraikitzeko proiektua, aurrekontua eta baldintzak
- Militar-esparrua egiteko Antiguako hareatzak lautzeko ikerketa, aurrekontua eta baldintzak
- 1871-1876 bitarteko gerra zibileko gotorlekuak
- Konkorrenea gotorlekua
- Polloeko hilerria eta sarbidea
- Txoritokietako ur-eroatea
- Igeldoko errepidea eta ikastetxea
- Antiguako kartzela
- Añarbeko ur-eroatea (lagunduta).
Erref. Serapio Mugica. "Arquitectos municipales de San Sebastián", Euskalerriaren Alde 1921, 81-85 orr.