Historiens

Perez-Fuentes Hernandez, Pilar

Historialaria, 1948an Bilbon jaioa.

Deustuko Unibertsitatean Aro Berriko eta Aro Garaikideko Historian 1972an lizentziatua, Zientzia Politikoetako eta Soziologiako doktoregoa EHUn eskuratu zuen, 1991n. Zenbait urtetan Deustuko Unibertsitatean liburutegi zaintzaile eta gero batxilergoko Geografia eta Historia irakasle izan ondoren, 1987. urtetik aurrera EHUko Historia Garaikidearen departamentuan lehenik bekaduna eta ondoren atxikiriko irakaslea izan zen. 1991z geroztik irakasle titularra da bertan, eta 2002tik, EHUko klaustroko partaidea da; 2004-2006 bitartean, Zientzia Sozialen eta Komunikazioaren Fakultateko Zuzendaritza Batzordeko partaidea izan zen. Horrez gain, hainbat unibertsitate eta ikasketa zentrotan egon izan da gradu-ondoko kurtsoak eta seminarioak ematen, Kuban besteak beste, eta Georgetown University-n (EEBB) gonbidaturiko irakaslea izan da.

Bere ikerketak Aro Berrian eta Aro Garaikidean kokatzen dira; Euskal Herriari dagokionez, bereziki industrializazio garaian. Familia mailako ekonomia eta bizi-maila, generoen eta lanaren arteko erlazioak, eta kultur esparru hispaniarreko genero ereduak eta identitateak izan ditu ikergai nagusi. Genero ikuspegitik idatziriko historiografiaren gaineko ikerketak ere egin izan ditu. Ugariak dira, historia sozialaren, demografia historikoaren eta emakumeen historiaren ikuspegiak jorratuz, eta Euskal Herriaren, Espainiaren eta Karibe hispaniarraren eremuetara bideraturik, ikertzaile soil nahiz nagusitzat parte hartu izan duen ikerketa proiektuak. Besteren artean, hauek aipatu litezke:

  • "Demografía interna y economías familiares en la zona de transición del País Vasco a finales del siglo XIX" (EHU, 1990-1991).
  • "El papel de las mujeres en la modernización económica del País Vasco: Análisis de la estructura ocupacional, 1850-1950" (Eusko Jaurlaritza / Emakunde, 1991).
  • "De la minería a la siderurgia: Estrategias familiares de una transición histórica" (Ministerio de Educación y Ciencia, 1993-1994).
  • "Matrimonio, cohabitación y familia en la Cuba colonial: Color, condición y género ante las estrategias de supervivencia y movilidad social" (EHU / Ministerio de Educación, 1997-1999).
  • "La construcción social de la identidad y de la diferencia en el País Vasco: género, clase y nacionalidad (1876-1976)" (Ministerio de Educación, 2002-2005).
  • "Las científicas sociales en España: Una investigación-acción" (Ministerio de Trabajo y Asuntos Sociales, 2005-2007).
  • "Gender and Well-Being: Interaction Between Work, Family and Public Policies" (European Science Foundation. Cost. European Co-operation in the field of Scientific and Technical Research, 2005-2009).

Espezializaturiko aldizkarietan eta argitalpen kolektiboetan argitaraturiko lan ugarien artean bere ikergaien ikuspegi orokor bat ematekotan, ondorengoak aipatu litezke:

  • "El concepto de género en las Ciencias Sociales". Non: T. NUÑO, J. GARCÍA (zuz.): Hacia la Escuela Coeducadora. 1º Postgrado de Coeducación. Bilbo: Emakunde, 1992; 133-143 orr.
  • "La modernización demográfica" (M. ARBAIZArekin batera). Non: Gran Atlas Histórico de Euskal Herria. Bilbo: LUR, 1995; 401-416 orr.
  • "Sistemas de género y proceso social en el País Vasco contemporáneo. Una aproximación desde el caso de Bilbao". Non: Emakumeak Euskal Herriko Historian = Las mujeres vascas en la Historia. Bilbo: Ipes, 1997; 175-199 orr.
  • "La historia económica y social frente al trabajo femenino. Estado de la cuestión y perspectivas". Non: Balance y perspectivas de los estudios de las mujeres y del género. Madrid: Ministerio de Trabajo y Asuntos Sociales / Instituto de la Mujer, 2003; 236-244 orr.
  • "A propósito de las identidades nacionales". Non: Historia e identidades nacionales. Bilbo: Servicios Redaccionales Bilbainos, 2007; 12-35 orr.
  • "Voces e itinerarios de historiadoras: un diálogo entre generaciones". Non: Las científicas sociales en España: una investigación-acción. Madrid: Ministerio de Igualdad / Instituto de la Mujer, 2007; 195-260 orr.
  • "Mujeres, trabajos y economías familiares en España (siglos XIX y XX)" (C. BORDERÍAS MONDEJARekin batera). Non: La historia de las mujeres: perspectivas actuales. Bartzelona: Icaria / AEIHM, 2009, 269-308 orr.

Halaber, hainbat liburu argitaratu dira bere izenpean, egile nahiz argitaratzaile izanagatik:

  • Vivir y morir en las minas. Estrategias familiares y relaciones de género en la I Industrialización vasca. 1877-1933. Bilbo: EHU, 1993.
  • Bilbao, Sociedad y Población (1825-1935) (M. GONZÁLEZ PORTILLArekin batera koord.). Bilbo: Fundación BBV, 1995.
  • Didáctica de la demografía histórica (arg.). Logroño: Instituto de Estudios Riojanos, 1999.
  • Cuba y España. Pasado y presente de una historia común (F. LUENGOrekin batera arg.).
  • Historia Contemporánea; 19 (ale monografikoa). Bilbo: EHU, 1999.
  • Mujeres, Hogares y Trabajo (arg.). Arenal; 9-II (ale monografikoa). Granada: Seminario de Historia de la Mujer / Universidad de Granada, 2002.
  • Las desigualdades de género en el sistema público universitario vasco (S. ANDINOrekin batera arg.). Gasteiz: Eusko Jaurlaritza / Emakunde, 2003.
  • Ganadores de pan y amas de casa: Otra mirada sobre la industrialización vasca. Bilbo: EHU, 2003.
  • Memorias de la emigración española a América (J.A. PÉREZ PÉREZ eta MªA. SALLÉ ALONSOrekin batera arg.). Madrid: Gobierno de España / Fundación Directa, 2010.

Beti ere aipatu gaien inguruan, ugari dira antolatu eta zuzendu dituen nazio nahiz nazioarteko kongresuak eta seminarioak, eta oso parte-hartze aktiboa izan du ikerketa elkarteetako eta aldizkarietako barne-dinamiketan; horrela, Arenal. Revista de Historia de las Mujeres eta Cuadernos de Alzate aldizkarietako Aholku Batzordeetan eta EHUko Revista de Historia Contemporánean parte hartzen du, eta "Asociación de Historia Contemporánea" eta "Asociación de Demografía Histórica" (ADEH) elkarteetako partaidea da; azken elkarte honetako batzordekide izan zen, 1996-1998 bitartean. Horrez gain, 2008az geroztik "Asociación Española de Investigación de Historia de las Mujeres"-eko (AEIHM) lehendakaria da. Politikaren alorrean ere parte-hartze aktiboa du, Euskal Sozialisten Taldeko parlamentaria baita, Bizkaiko partaide lez.