Konpositore eta organista gipuzkoarra, Zumaian 1855eko otsailaren 15ean jaioa eta Bilbon 1944ko abuztuaren 7an hil zena.
1876an, Madrilgo Musika eta Deklamazio Eskola Nazionalean sartu zen, eta lau urte geroago pianoko eta konposizioko lehen sariak lortu zituen. 1880an San Luis de los Francesesen organista eta kapera-maisu plaza irabazi zuen eta 1886an San Jeronimorena, biak 1936ra arte mantendu zituenak. Eliz musikako piezak idatzi ditu, besteak beste, Itziarko Birjiña Euskarichoa, Meza Nagusia Do-n, 1900ean Zumaiako Euskal Jaietan estreinatua, Artzain Meza Re-n eta Arritokietako Salbea, 1885eko kolera-epidemiaren kariaz konposatua eta harrezkero Zumaiako parrokian interpretatzen dena. Halaber, gai profanoak konposatu zituen, hala nola Sangre autismo eta La redención de un padre drama lirikoak eta Una vara de castigo jostailu komiko-lirikoa. 1929an estreinatutako Suite Sinfonikoa Mi minorrean ere bai.