Patxi.
Euskarazko apaiz eta jesuita idazlea, 1900eko apirilaren 23an Andoainen (Gipuzkoa) jaioa. 1989an hil zen.
Eusko Folklore Elkartearen Urtekariaren kolaboratzailea 1923tik. 1925ean apaiztu zen eta, 30 urte zituela, jesuita egin zen. 1930ean Argia aldizkariko zuzendari izendatu zuten. 1931n erbesteratu egin behar izan zuen, jesuita guztiek bezala; bere kasuan, Belgikan bizitzea egokitu zitzaion. 1933an Txinara joan zen misiolari, eta abiatu baino lehentxeago literatur sari bat irabazi zuen Bost lore poema luzearekin. Urte horretan bertan itzuli zuen La Eneida.
1952an Formosa uhartera pasa zen, Maoren iraultza komunistaren ondorioz. 1956 eta 1959 artean Euskal Herrian bizi izan zen, bere nagusiek deituta Bibliaren itzulpena eta edizioa prestatu berri zuela, xehetasun batzuen faltan Olabide utzi zuena. Biblia hori 1958an argitaratu zenean eta eginbeharra amaitu zenean, Formosara joan zen, eta handik urte batzuetara Filipinetara. Misioetan 54 urte eman ondoren, 1987an Loiolako santutegira itzuli zen. Poesia, bertso eta prosa asko idatzi zituen. Argia, Euzko Deya, Karmel, Jesusen Biotzaren Deya, Olerti, Tierra Vasca, Euzko Gogoa eta Yakintza aldizkarietan argitaratu zituen bere artikuluak. 2000. urtean, Hiria argitaletxeak eta Egan aldizkariak, elkarrekin, autore honen antologia poetiko bat argitaratu zuten.