Pili.
1970ean Donostian (Gipuzkoa) jaiotako idazlea.
Informazio Zientziak ikasi zituen EHUn, eta Elhuyarren egin du lan, zientzia-gaiak euskaraz ikertzen eta zabaltzen dituen elkartean. 18 urte zituenean euskara ikastea erabaki zuen, "batez ere Bernardo Atxaga irakurri ahal izateko, zerbait interesgarria galtzen ari nintzela sentitzen nuelako", adierazi zuenez. 1998an, Euskararen Gizarte Erakundeen Kontseiluko (Kontseilua) komunikazio-arduradun gisa hasi zen lanean, eta 2000. urtean utzi zuen postua. Hainbat hedabidetan egin du zutabegintza, eta Euskal Telebistako Teknopolis saioaren aurkezlea da, hain zuzen ere, zientziaren dibulgazioan aritzen den saioarena.
1999an Erein etxean Ur tximeletak olerki bilduma argitaratu zuen, gehiena euskaraz, eta beste batzuk gaztelaniaz. Norberaren sentimenduetan oinarrituta idatzitako poemak dira. "Nire poesiek ez dute gezurrik esaten. Horietan bakarrizketa bat dago nire buruarekin, egiazkoa eta sakona. Eta poesia horiek izaera terapeutikoa ere badute", adierazi zuen egileak. 2000. urtean Poesiaren alde, poesiaren kontra poesia errezitaldian parte hartu zuen, Gerardo Markuleta, Kirmen Uribe, Iban Zaldua eta Arantxa Ozaetarekin batera.