Eskultore garaikidea, Logroñon 1961ean jaio zen. Gasteizen bizi eta lan egiten du.
Arabako testuinguruan, bere burua laurogeiko hamarkadaren erdialdean ezagutarazi zuen, Gasteizko Udalak babestutako Eskultura Tailerrei esker. Azken urteotako hiriaren ikur nagusietako baten sortzailea da: Arca plazako El caminante (“Ibiltaria”). Lan hau 1985eko aire zabaleko eskultura-tailerretan sortu zen, 3,5 metroko altuerakoa, jatorriz beira-zuntzez eta poliesterrez egina, 1989an brontzezko irudia jarri zen.
Eskultore moderno gisa, Eguizábalek askotariko materialekin egiten du lan, baita hondakin industrialeko metalekin ere. Hain zuzen ere, 1984ko Eskultura Tailerreko kide batekin, Marco Ibáñez de Mataucorekin, Herri-maratoiari omenaldia egin zuen, objektu metaliko abandonatuak eta herdoiltsuak erabiliz. Pieza hori Mendizorrotzako Beti-Jai frontoien inguruan kokatuta, Udalak 2002tik aurrera espazio publikoetan diseinatu dituen eskulturen berrantolaketa dela eta bere jatorrizko tokitik lekuz aldatu da.
Jose Migel Barandiaran aitaren jaiotzaren mendeurrena ospatzeko, Euskalerriaren Adiskideen Elkarteak eginiko proposamena aintzat hartuta, 1989an, eta Trebiñutik ekarritako harria erabiliz, dolmen baten egitura eraiki zuen. Egitura megalitiko hau Arabako hiriburuko Txile kaleko lorategi batean dago.
--
- CASTAÑER LÓPEZ, Xesqui. "Arte publikoa Gasteizen. Eskultura hiri-espazioan". Eskulturak Gasteizko espazio publikoetan, Gasteizko Udala, 2002.
- "Eskulturako III. tailer irekia. Artea kanpoan sortzea". Udal Informazio Buletina, 54. zk., 1985eko 2004ko iraila, Gasteizko Udala, 24-27.