1939ko apirilaren 14an Donostiako Añorga auzoko Unanue-Berri baserrian jaiotako musikari gipuzkoarra. Trafiko istripuan hil zen, Donostian, 1986ko abenduaren 22an.
18 urterekin hasi zen Donostiako Orfeoian tenore gisa kantatzen. Bi urtez abesbatzako zuzendariorde izan ondoren, 1968an Orfeoiko zuzendari bihurtu zen, Juan Gorostidi ordezkatuz. Bere agindupean, abesbatzak Espainiako eta nazioarteko ospe handiena lortu zuen: Arte Ederren Urrezko Domina (1975), San Fernandoko Arte Ederren Akademiaren Ohorezko Domina (1983), Asturiasko Printzearen Saria (1984) eta Toulouseko eta Gipuzkoako Urrezko Dominak (1985) jaso zituen.
Halaber, bere babespean (1984) Musika Lantegia eta Kantu Eskola sortu ziren orfeoiaren barruan. Ayestaránekin, abesbatzak nazioarteko birak ugaritu zituen; Berlingo Areto Filarmonikoa eta Royal Festival Hall, bisitatu zituen, birak egin zituen Filadelian eta Washingtonen (1980), Israelen (1982), Suitzan (1986) edo SESBen (1986). Garai hartan ere, diskografia modu berezian zabaldu zen, eta estatuko jaialdietara joatea sendotu egin zen, hala nola Granada, Santander, Musika Hamabostaldia baita agertoki handietako agerraldiak, besteak beste Madrilgo Teatro Realekoa edo Bartzelonako Palau de la Músicakoa.
Haren hiletak Donostiako Koruko Andre Maria basilikan egin ziren, eta orfeoiak parte hartu zuen, Rafael Frühbeck de Burgosek zuzenduta.
--