1949an Hondarribian jaiotako musikari gipuzkoarra. Konpositorea eta abesbatzen zuzendaria. Medikuntzan graduatua Valladolideko Unibertsitatean. Musika modu autodidaktan ikasi zuen; abesbatzen zuzendaritza Erwin maisuarekin. 1971 eta 1976 artean Valladolideko Ederki abesbatza zuzendu zuen, eta 1975ean hirugarren saria lortu zuen Tolosako Abesbatzen Lehiaketan.
1978an, Hondarribiko Eskifaia abesbatza sortu zuen, eta 1994ra arte zuzendu zuen. Lehen sariak Ejea de los Caballeros, Tolosa, Aviles, Tours, Austria eta Alemanian irabazi zituen. 1995ean, Kanta Cantemus Koroa (1995) sortu zuen, emakumezkoen ganbera-abesbatza, zeinarekin lehen sari bat irabazi baitzuen Tourseko "Florilege Vocal"-ren XXVI. edizioan, bai eta Frantziako Kultura Ministerioaren sari bat ere. Kontzertuak zuzendu ditu Gipuzkoan, Gasteizen, Ponteareasen (Galizia), Medina del Campon (Valladolid), Madrilen, Murtzian, Münster-Alsazian (Frantzia), Iruñean, Segovian eta Kanaria Handiko Las Palmasen.
Tolosa, Ejea de los Caballeros (Zaragoza), Saint-Léger-Sous-Beuvray (Frantzia), Arezzo (Italia), Las Palmas (Kanaria Handia) eta Takarazukako (Japonia) lehiaketetako konposizio eta interpretazio epaimahaietako kidea.
Konposizio sariak lortu ditu Bilbon, Tolosan, Igualadan, etab.
Missa pro defunctis (1997) lanaren egilea. Bere jaioterrian 1980an konposatutako Ave María a siete voces lanak izaera intimista argia du. Super flumina Babilonis, abesbatza misto eta saxo altuarentzat, 2004ko Musikaste jaialdian estreinatu zen; Leioako San Juan Bautista abesbatzak eta Mikel Zabala saxofoi-jotzaileak egin zuten lan hori.
Bere konposizioak Alemanian, Estatu Batuetan eta Suedian argitaratzen ari dira. Tokio Cantat-2000ko zuzendari gonbidatua izan zen.
2005ean Hondarribia Ametsetan argitaratzen du, bere 25 urteko ibilbidearen bilduma.