Militarra eta industria-teknikari gipuzkoarra, Oñatin jaio zen 1798an, eta hantxe eraiki zen bere oroimenean iturri bat. 1873an hil zen.
Liberala izan zen eta 1820an 1812ko Konstituzioaren aldeko mugimenduan parte hartu zuen. 1823an Torrijos eta Sancho jeneralekin emigratu zuen. Atzerriratua izan zen bitartean, ikasketak zabaldu zituen eta Marbellako eta Pedrosako burdin fabrikak zuzendu zituen Andaluzian, baita Reuniongo ikatz meategien ustiapena ere. Gobernuaren aginduz, eta jada artilleriako ofizial gisa, 20 urtez Trubiako Fabrika Nazionala zuzendu zuen. Oviedoko arma-fabrika ere zuzendu zuen. Artilleriako Mariscal gradua lortu zuen.